Lo dèrbi Limós-Carcassona aviá ramosat un brave public aqueste dimenge a L’Agulha. Lo debat pareissiá inegal entre lo cap de fila local e una esquipa de Carcassona en dificultat, amb unes novèls nafrats e unes cambiaments de darrièra minuta dins la formacion. Lo XIII de despart èra solide, mas se vesiá ja que los rotlaments de jogaires serián de mal gerir. Ça que la, los Canaris ataquèron a fons la partida e marquèron dos ensags dins las sièis primièras minutas per Savage e Gressèque al tèrme d’atacas amplas. Lo meteis Gressèque ajustèt una transformacion e una penalitat e al cap d’un quart d’ora, los vesitaires menavan 12-0. Mas Ferriòl fasiá parlar sa poissança per marcar. Gressèque ajustava una novèla penalitat. Jewit raprochava los limosencs a 14-12 a la pausa. Los jaune e negre tornavan prene la partida pel bon costat e sus una pauma escartada, l’alièr Sobeiràs marcava dins lo canton. Mas Filipo, amb un ensag transformat per Murcià, metiá las esquipas a egalitat a la 52a. Carcassona ensagèt encara d’atacar, prenguèt d’iniciativas mas, coma la cabra de Sénher Seguin, se faguèt manjar a la fin amb dos novèls ensags del locals que los privavan, tant qu’a i èsser, del bònus defensiu. Marca finala: 33-18 per Limós e l’espèr d’èsser dins la pola bèla de la segonda fasa de mai en mai pichona pels carcassoneses.
 
D’aquel temps, Lesinhan s’impausava aisidament a Palau 28-0 e los Dragonets anavan ganhar als Minims fàcia al Tolosa Olimpic: 38-26. Meteissa marca a Vilanuèva d’Òlt amb la victòria dels Laupards contra Avinhon.
 
I aurà pas de pausa nadalenca per Carcassona, Lesinhan e los Dragonets qu’an doas partidas de retard. Alara, son programats aqueste dimenge, los rescontres Carcassona-Lesinhan e Dragonets-Tolosa Olimpic.
 
Aquesta dimenjada, se debanavan las finalas de la Copa de la Liga Lengadòc-Rosselhon que vegèron las victòrias del XIII Catalan en benjamins, de Sant Estève en cabdèths, e en Federala, lo trofèu prenguèt lo camin de Sant Laurenç de la Cabrerissa qu’anèt batre Vilanuèva de Menerbés sus son èrba: 24-16.
 
En desplaçament a Roana e mercé a una larga victòria 36-16, l’esquipa de nacionala 1 de Vilagalhenc-Argon ganha lo dreit de jogar los oitens de finala de la Copa de França, que se debanaràn la dimenjada dels 11 e 12 de genièr amb l’entrada en competicion de las esquipas d’Elèit.
 
A Perpinhan, los Dracs an fait signar un contracte de 3 ans al jove arrièr Morgan Escarré.
 
 
 
 
Alan Roch